1. اینسانین ذاتیندا منجیل‌لیک (خودخواه‌لیق) وار. تقریباً هر کیمین ایچیندن خبرین اولسا، گؤره‌جکسن کی فیکر ائلیر بیر پارا قونولاردا چوخ بتر بیریسی‌دیر. اینسانین ذاتی بودور. کندینه آنلاملی* اولان قونولاردا، کندینی هامیدان اوستون بیلر. حتی لاپ منصف بیریسی باشقا بیر آدامی تعریف و تمجید ائلینده (بو معنیده کی او مندن یاخجی و داها اوستوندور**) بئنین منطقی اونو بو سؤزلری دئمگه مجبور ائتسهده، آما اورگینین دیبینده، گیزلی و بیلینمز بیر قایناق‌دان دوغموش قیسقانجلیق دویقوسو اولار. آما بیر زامانلار وار اینسان عمل‌ده و سونوج اولاراق باشقا بیریلری‌نین اؤزوندن یاخجی اولماغین گؤرندن سونرا، آخشام گلیپ و اؤز خلوتینده*** اولارا فیکرلشنده، اورگینده اونلارین یاخجیلیغینا اذعان ائدر و اؤزونون اؤنملی بیر شئی اولادیغی حقیقته وارار.
2. بوگون بیر نفرین خاطیره‌لریندن ایکی صفحه اوخودوم و گینه اینسانین نه قدر درینلره وارابیله‌جگینی عینا گؤردوم. اینسانلار آراسیندا اولابیلن فاصله‌نی گؤردوم. اینسانی دوشونجه‌ده بوغابیلن قورخونج بیر فاصیله! فرض ائت بیر اوقیانوس وار، بوتون بالیقلار سو اوزونون ایکی مئتیرلیگینده اوزورلر و ایکی اوچ بالیق اوقیانوسون دیبینده گئدیرلر! بوجور یانی، وحشتناک. و آدام او قدر گونده‌لیک سیرادان و روتین ایشلرده بوغولوپ کی بو فاصیله‌نین فرقینده بیر ذره بیله دگیل. بیر آن سیرادان ایشلردن سییریلیپ و اولدوغون یئرین فرقینه واراندان سونرا، آدامین ایچی چؤکور و گینه او همیشه‌کی سورو یارانیر من نیه یاشییرام؟!». البته کی بو سورو بوتون اینسانلارا گئچرلی‌دیر آما بورادا گئنل آنلامدا اینسان اوغلوندان سؤز ائتمیرم، بلکه بورادا من»ی داها دا قاباریق بیر شکیلده یازیپ و سوروشورام من نییه وارام و نیه یاشییرام؟!»
----
*هر قونو هر کسه آنلاملی دگیل. مثلا بیر فوتبول اویونجوسونا، والیبال آنلاملی دگیل، و برعکس و یا بیر شاعیره، رومان آنلاملی قونو دگیل.
** البته کی آنلاملی قونولاردا
*** منظور، سیرادان‌لیق دئوین‌دن بیراز آیریلاندان سونرا
درباره این سایت